طريقه الرقاق من العجينه للصنيه من مطبخ ام صلاح اللولبيه بالصوررررررررررررررررر

طريقه الرقاق من العجينه للصنيه من مطبخ ام صلاح اللولبيه بالصوررررررررررررررررر
ازيكم يا مزيكاويه يا لولبيات ههههههههههه النهارده هاعمل طريقه الرقاق من اول العجين ممكن واحده ناصحه تقوليمانشتريه جاهز ونريح نفسنامش في المود خالصها قولها ده لو انتي في مصر انما احنا برة مصر بندور عليه زي المخدرات ومعلش هاطول عليكوا يعني انا مش محترفه اوي ولا حاجه بس الحاجه ام الاختراع وابوه كمان وجربت مرة واتني لحد ما الحمد للله ما بقتش احرم جوزي من الرقاق ده ابدا نخش بقي علي المهم
اولا نحضر 4 اكواب دقيق منخولين في ايناء وذره ملح عليهم وبعدين نعجن بماء دافئ والكميه مش محدده المهم نعجن لغايه ما العجينه تلم وتبقي حلوة زيكم كده ونلت ونعجن زي مانا بلت واعجن كده برضه وبعد ماندوخها من اللت والعجن دايخةنيسبها تريح لها ساعه كده وبعدين نجيبها ونقسمها لكور طبعا نرش الترابيزة اللي هانشتغل عليها مثلا بالدقيق ونرص الكورات عليها ونرش فقهم شويه دقيق صغيرة بس عشان ماتنشفش زي كده




وبعدين يا حلوات نجيب كورة كورة ونفردها علي حاجه مرشوشه دقيق عشان ماتلزقش انا بشتغل علي ترابيزة المطبخ ونبططها الاول بادينا وبعدين نفرد بعصايه الفرد او المردانه وبرضه بادينا نشد يعني نعما اكروبات لغايه مانرقها عشان ماتبقاش جامده وتخينه لما تستوي وبعدين نكون مولعين الفرن علي درجه حراره متوسطه ونسيب الباب مفتوح واحنا بنسوي طبعا ونحط اول رقاقه عملناها
في الفرن عشان تستوي ونفرح كده بنفسنا وهي بتقب واثناء ماحنا بنسوي نحاول نفرد واحده تانيه بس ناخد بالنا من اللي في الفرن عشان بيستوي بسرعه ونقلبه علي الناحيتين وبس نستمر لغايه ما الكميه تخلص زي كده



وبعد كده نيجي للصنيه انا عملتها تاني يوم نعمل ايه بقي
1- نعصج اللحمه المفرومه ونسيبها
2-نسيح شويه سمنه او زبده او الاتنين علي بعض ونسيبهم جمبنا
3- نجيب حاجه واسعه صنيه مثلا عشان نبلل فيها الرقاق ونحط فيها ايه بقي نحط شويه شوربه سخنه حلوة كده وعليهم شويه لبن ولو محتاجه بهارات حطي فلفل اسود ملح كمون اللي انتي عاوزاة(انا بحط الصنيه دي علي نار البوتجاز واوطيها عشان تفضل سخنه وانا ببل)
4-ندهن الصنيه اللي هانسوي فيها الرقاق
ونعمل ايه بقي نجيب اول رقاقايه ونبلها في الشوربه السخنه نبللها كويس وبعدين نحطها في الصنيه اللي هانسويه فيها وندهن وشه بادينا كده سمنه خفيفه من اللي سايحناهاونعمل الحكايه دي في اول قسم من الصنيه وليكن اربع رقاقات وندهن بين كل واحده مسحه سمن
خلاص كده نجيب بقي اللحمه المفرومه ونحطها زي كده

وبعدين نحط باقي الرقاق اللي هما اربعه برضه ونمسح سمنه بين كل واحده وعلي اخر واحده نرش كده شويه سمنه ونقولها باي علي الفرن ونسيبها تستوي من تحت
ونحضر صفار بيضتين ونضربهم مع شويه لبن وفلفل وملح ونطلع الصنيه ندهن الوش بالبيض زي كده




ندخلها تاني تاخد وش وبعدين نطلعها ونطفي الفرن ونشربها شوربه كويس وتكون شوربه سخنه وندخلها تاخد حرارة الفرن عشان تقعد كده علي رواقه تشرب شويه الشوربه اللي حطناها عليها
وبعدين هانلاقيها كده



ودوقي بقي احلي صنيه رقاق فيكي يا مصر ويا سعوديه ويا كل الدول العربيه استنوا معلش عارفه اني زهقتكوا بس الطبق ده هايروح فين